03 марта 2021 — 10:40
Які хлапчук у дзяцінстве не цікавіцца маркамі машын, не марыць аб прыгожым аўтамабілі? Напэўна, гэта захапленне кожнага хлапчука. Не выключэнне і вучань 9 “Г” класа пятай гарадской школы Іван Вітовіч. Але яго цікавасць стала штуршком да штодзённай удумлівай работы і прывяла да высокіх вынікаў.
Пачаўшы працу з класам у якасці настаўніка беларускай мовы і літаратуры і класнага кіраўніка, я адразу адзначыла ўдумлівага і стараннага вучня. Івана заўсёды цікавілі гуманітарныя навукі. Ён спрабаваў свае сілы і на школьнай алімпіядзе па беларускай мове, і на прадметных конкурсах. Таму ў 8 класе я і прапанавала юнаку далучыцца да даследчай дзейнасці. Мая прапанова знайшла водгук, і распачалася праца. Вельмі вялікае даследаванне! Патрэбна было азнаёміцца з працамі іншых даследчыкаў і перачытаць шэраг мастацкіх твораў, каб адшукаць неабходныя прыклады, граматна занатаваць зробленыя высновы. Вынікам усяго стала даследчая работа “Наменклатурныя назвы марак аўтамабіляў: семантычныя, граматычныя асаблівасці і арфаграфічнае афармленне”.
Работа была прадстаўлена на раённы этап конкурсу “Крыштальная Альфа” і адзначана дыпломам І ступені. У выніку Ваня стаў удзельнікам ХІІ абласнога конкурсу работ даследчага характару. У лістападзе 2020 года праходзіла абарона работ. Ды як паспяхова для Вані! Ён стаў абсалютным пераможцам у сваёй секцыі і атрымаў права прадстаўляць Гродзенскую вобласць на рэспубліканскім этапе.
Апошнія дні лютага выдаліся для юнака вельмі напружанымі. Удзел у рэспубліканскім (выніковым) этапе конкурсу (канферэнцыі) вучняў – вельмі адказная справа. Іван гэта добра разумеў і таму падышоў да падрыхтоўкі з усёй адказнасцю. Эмацыянальнае і граматнае прадстаўленне работы, правільны і разгорнуты адказ на пытанні членаў журы далі жаданы вынік – дыплом ІІІ ступені ў секцыі “Лінгвістыка”. Трэба адзначыць, што Ваня быў адным з самых маладых удзельнікаў конкурсу. А гэта значыць, што наперадзе ў яго яшчэ шмат магчымасцей. А мы ўсе, настаўнікі, родныя, верым у яго, ганарымся дасягнутым вынікам і жадаем далейшых перамог!
Ганна Трафімовіч,
настаўнік беларускай мовы і літаратуры
Перепечатка материалов допускается с письменного разрешения «учреждение «Редакция газеты «Зара над Нёманам».
Назад