19 сентября 2017 — 09:53
Папулярызацыя беларускага слова, павышэнне цікавасці чытачоў да беларускай кнігі – адна з важнейшых задач, якая стаіць перад бібліятэкамі. У ДУК “Мастоўская раённая бібліятэка” гэтаму накірунку работы ўдзяляецца асаблівая ўвага. Для рэалізацыі данай задачы тут выкарыстоўваюцца разнастайныя формы і метады. Аб іх мы гутарым з дырэктарам установы Таццянай Іосіфаўнай Стэльмах.
— Таццяна Іосіфаўна, работа па папулярызацыі беларускай кнігі праводзіцца бібліятэкамі раёна па розных напрамках. Раскажыце, калі ласка, аб іх.
— Сапраўды, гэта работа шматгранная. Вось і наша размова адбываецца падчас правядзення інфармацыйнага тыдня “Гаворым і чытаем па-беларуску”, пры гэтым бібліятэкары не толькі праводзяць шэраг мерапрыемстваў (сярод якіх гучныя чытанні, акцыі, пасяджэнні літаратурна-музычнай гасцёўні “Натхненне”, масавыя мерапрыемствы і многае іншае), але і самі размаўляюць з наведвальнікамі толькі на беларускай мове. Адзначым, што такі інфармацыйны тыдзень арганізуецца не ўпершыню. Так, на працягу апошніх трох гадоў праводзілася дэкада беларускай і краязнаўчай кнігі “І роднай мовы чуў я гукі…” Пры правядзенні мерапрыемстваў бібліятэкары распрацоўваюць цікавыя сцэнарыі, афармляюць кніжныя выставы і пры гэтым імкнуцца стварыць адпаведную атмасферу, якая б дапамагла ўдзельнікам акунуцца ў пэўную эпоху. Прыемна ўражвае нашых чытачоў і афармленне бібліятэкі: назвы тэматычных паліц, выстаў, змешчаныя тут цытаты — усё на беларускай мове.
Сёлета ў цэнтры ўвагі творчасць класікаў беларускай літаратуры Я.Купалы і Я.Коласа, іх 135-гадовы юбілей шырока адзначаюць у нашай краіне. Таму вялікім інтарэсам карыстаецца аформленая выстава “Паклон ад нас прыміце, Песняры”. На ёй прадстаўлены кнігі пра жыццёвы і творчы шлях пісьменнікаў, іх творы, а таксама электронныя выданні.
Выставы і тэматычныя паліцы “Мой край завецца Беларуссю”, “Людзі культуры Гродзеншчыны”, “О,Беларусь! Ты — сэрца і душа”, “Гродзеншчына літаратурная”, “З павагай да беларускай кнігі” адрасаваны шырокаму колу карыстальнікаў. Безумоўна, цікавяцца жыхары раёна і творчасцю сваіх землякоў С.Крыўца, М.Явара, А.Тарарук і многіх іншых.
Заўсёды з нецярпеннем чакаюць мастаўчане сустрэч з беларускімі пісьменнікамі. Так, у верасні намі была арганізавана сустрэча з Б.Ермашкевічам, Дз. Радзівончыкам, Л.Шаўчэнка, А.Апанасевічам. Частымі гасцямі ў раённай бібліятэцы з’яўляюцца члены Саюза пісьменнікаў Беларусі. Такія мерапрыемствы заўсёды праводзяцца ў цёплай атмасферы і выклікаюць вялікую цікавасць у жыхароў Мастоўшчыны.
— Новыя тэхналогіі фарміруюць і новую інфармацыйную прастору. Якія сучасныя метады і формы вы выкарыстоўваеце ў рабоце па папулярызацыі беларускага слова?
— Вялікая ўвага надаецца папулярызацыі беларускай кнігі праз сайт, сацыяльныя сеткі. Так, на сайце ў раздзеле “Беларуская кніга для вас” змешчана прэзентацыя “Беларускія кнігі–юбіляры 2017”, а ў рубрыцы “Краязнаўства” ўвазе чытачоў прадстаўлена прэзентацыя “Роднаму краю часцінку душы прысвячаю”, аўтарам якой з’яўляецца Г.І.Васілеўская. Адзначым, што Галіна Іосіфаўна – чалавек вельмі творчы, піша вершы на рускай і беларускай мовах, займаецца фатаграфіяй. Выставы яе фотаработ упрыгожваюць нашу бібліятэку, дарэчы, кожная работа падпісана радкамі з яе беларускамоўных вершаў. Асаблівую цікавасць у наведвальнікаў выклікае фотавыстава “Мясціны Элізы Ажэшкі”.
Адной з галоўных формаў папулярызацыі беларускай кнігі з’яўляецца выставачная рэклама. Зараз можна ўбачыць, як аформлена акцыя “Асалода чытання”, “Кніжныя жмуркі”. Новай формай работы з’яўляецца правядзенне рэкламна-іміджавай акцыі.
— Ці ўлічваецца чытацкі густ пры папаўненні кніжнага фонду?
— Нашы бібліятэкары дакладна аналізуюць чытацкі густ, вывучаюць запыты сваіх наведвальнікаў. Мы ўлічваем інтарэсы і пажаданні ўсіх катэгорый грамадзян. У кніжным фондзе раённай бібліятэкі зараз налічваецца амаль 44 тысячы дакументаў на беларускай мове, і яго папаўненне – гэта пастаянны працэс. За 1-ае паўгоддзе было выдадзена чытачам амаль 30 тысяч дакументаў на беларускай мове. З многімі беларускімі аўтарамі мы працуем напрамую. У нас кожны знойдзе кнігі на свой густ.
— Таццяна Іосіфаўна, творы якіх беларускіх аўтараў карыстаюцца асаблівай папулярнасцю ў чытачоў?
— Канешне ж, гэта класіка: творы М.Багдановіча, В.Быкава, У. Караткевіча, І. Мележа, з сучасных аўтараў – С.Алексіевіч, А.Федарэнка, Г.Далідовіч і многія другія. У нас аформлены стэлаж “Мая беларуская кніга”, дзе прадстаўлены выданні менавіта беларускіх аўтараў. Хочацца адзначыць, што гэтымі творамі цікавяцца як дарослыя, так і дзеці. Самых маленькіх чытачоў вабіць выстава “Чытаем беларускую казку”. З задавальненнем дзеці чытаюць творы В.Віткі, У.Мазго, Г.Скаржынскай, У. Ліпскага, Р.Баравіковай. Радуе, што школьнікі бяруць не толькі творы школьнай праграмы, але і зыходзячы з уласных інтарэсаў.
— Дзякуй, Таццяна Іосіфаўна, за размову. Упэўнена, што ў год святкавання 500-годдзя беларускага кнігадрукавання, які прасякнуты атмасферай любві да беларускага слова, прыхільнікаў беларускай мовы стане яшчэ больш.
В.ЦІШКО
Перепечатка материалов допускается с письменного разрешения «учреждение «Редакция газеты «Зара над Нёманам».
Назад