04 апреля 2025 — 09:03
Аб надыходзе вясны найбольш эфектыўна за каляндар ці надвор’е нагадваюць птушкі. У нейкі момант мы чуем ласкавы шчэбет і разумеем: свет, нарэшце, прачынаецца пасля зімовай спячкі. Надышоў час вяртання на радзіму і пошуку новага жылля!
З мэтай фарміравання ў вучняў экалагічнай культуры і беражлівых адносін да навакольнага асяроддзя праз удзел у сацыяльна-значнай дзейнасці з лютага па красавік гэтага года праводзіўся раённы конкурс шпакоўняў і сінічнікаў “Звонкая вясна”, прысвечаны Міжнароднаму дню птушак, які адзначаецца 1 красавіка. Удел у конкурсе прынялі выхаванцы ўстаноў дашкольнай і вучні агульнай сярэдняй адукацыі раёна. Відавая разнастайнасць і асаблівасці гнездавання заўсёды пад пільнай увагай пачынаючых бердвотчараў і іх педагогаў.
Было прадстаўлена 28 шпакоўняў і 8 сінічнікаў. Апартаменты на любы густ і колер! Юныя архітэктары стварылі цэлыя “нябесныя рэзідэнцыі”, птушыныя “фуд-корты” і атэлі з дэкорам. Сярод мноства цікавых канструкцый ёсць і ўтульныя экахаткі, і дуплянкі, і вінтажныя гняздзечкі. Сапраўднае мастацтва!
Але конкурс застаецца конкурсам. Для крылатых навасельцаў інтэр’ер зусім няважны. Плошча гасцёўні і памер уваходных дзвярэй – вось што мае значэнне.
Каб зрабіць шпакоўню ці сінічнік сваімі рукамі, дастаткова адной дошкі і неабходныя інструменты. Тэхналогія вельмі простая: птушынае жытло шліфуецца звонку, а ўнутры хаткі сценкі павінны быць некранутыя. Абавязкова – здымны дах, каб восенню пачысціць. Увогуле, нерухомасць для шпакоў, сініц, мухаловак павінна быць натуральнай.
Для ацэньвання работ былі запрошаны ляснічы Пескаўскага лясніцтва дзяржаўнай лесагаспадарчай установы “Шчучынскі лясгас” Юрый Казлоўскі, кіраўнік і галоўны спецыяліст Мастоўскай раённай інспекцыі прыродных рэсурсаў і аховы навакольнага асяроддзя Алена Танкевіч і Дзмітрый Скірко.
Работы, якія адпавядаюць патрабаванням гняздоўяў, развешаны ў дэндрапарку ва ўрочышчы Міхайлоўка, на тэрыторыі эколага-біялагічнага цэнтра і Мастоўскага раённага аддзела па надзвычайных сітуацыях.
Алена РАХУНАК, загадчык аддзела экалагічнай адукацыі і сацыякультурных камунікацый ЭБЦ Мастоўскага раёна
Перепечатка материалов допускается с письменного разрешения «учреждение «Редакция газеты «Зара над Нёманам».
Назад