![XII “Рэспубліканскія Купалаўскія чытанні” праходзяць у ГрДУ імя Янкі Купалы](/ru/files/news/image/684/0/1573834860.jpg)
Навуковая канферэнцыя прысвечана 80-годдзю ўніверсітэта і філалагічнага факультэта.
Плённай працы ўсім ўдзельнікам на пачатку канферэнцыі пажадаў прарэктар па навуковай рабоце Гродзенскага дзяржаўнага ўніверсітэта імя Янкі Купалы Юрый Раманоўскі. Ён адзначыў, што для навукоўцаў вельмі важна знаходзіцца ў пастаянным пошуку новых ідэй, новых накірункаў для даследаванняў, а постаць Янкі Купалы, яго літаратурная спадчына, безумоўна, заслугоўваюць пільнай увагі лінгвістаў і літаратуразнаўцаў.
– Янка Купала – знакавая асоба для ўсіх беларусаў, а для нас, прадстаўнікоў Гродзенскага дзяржаўнага ўніверсітэта, – асабліва. Тое, што нас аб’ядноўвае, – гэта слова “купалаўцы”. Мы сябе называем “купалаўцамі” і гэтым ганарымся, – адзначыў Юрый Раманоўскі.
![IMG_3803-f116fc2f46.jpg](https://grodnonews.by/upload/medialibrary/d06/d06f00a573a70483ce34bbc1afad4aff.jpg)
Да ўдзельнікаў канферэнцыі – навукоўцаў з розных гарадоў нашай краіны і з суседняй Польшчы – таксама звярнулася дэкан філалагічнага факультэта ГрДУ імя Янкі Купалы Іна Лісоўская. Яна адзначыла, што заявак да ўдзелу ў Купалаўскіх чытаннях штогод дасылаецца вельмі шмат. А гэта значыць, што канферэнцыя карыстаецца папулярнасцю, аб традыцыйным купалаўскім форуме ведаюць не толькі ў нашай краіне, але і за яе межамі. Так, з навуковым дакладам і прывітальным словам сёлета выступіла дацэнт кафедры беларусістыкі Варшаўскага ўніверсітэта Вольга Трацяк. Яна павіншавала ад імя польскіх калег Купалаўскі ўніверсітэт з надыходзячым юбілеем і выказала спадзяванне, што плённае супрацоўніцтва паміж нашымі ўніверсітэтамі працягнецца і надалей. Тым больш, што ў гэтым годзе была падпісана адпаведная дамова аб двухбаковым супрацоўніцтве паміж кафедрай беларусістыкі Варшаўскага ўніверсітэта і кафедрай беларускай філалогіі ГрДУ імя Янкі Купалы.
![IMG_3902-a544dcba7e.jpg](https://grodnonews.by/upload/medialibrary/26f/26f231976c17eafd53e95a89475d6b5a.jpg)
“Рэспубліканскія Купалаўскія чытанні” ўпершыню былі праведзены ў 1995 годзе. Сёлетняя сустрэча – 12-я па ліку. Удзельнікі канферэнцыі працавалі па наступных напрамках: “Янка Купала і сусветная літаратура”, “Янка Купала ў беларускім літаратуразнаўстве”, “Творчасць Янкі Купалы і Якуба Коласа ў вышэйшай і сярэдняй школе”. Падчас пленарнага пасяджэння і работы секцый абмяркоўваліся не толькі розныя аспекты творчасці класіка беларускай літаратуры, але і актуальныя праблемы сучаснага літаратуразнаўства і мовазнаўства.
![IMG_3945-8fc98ac2ef.jpg](https://grodnonews.by/upload/medialibrary/5be/5beaf545fe5f85bca7d81fe959454234.jpg)
![IMG_3806-8a4669fcf1.jpg](https://grodnonews.by/upload/medialibrary/b6a/b6a26a8ea3b3ed040930c2626062db6a.jpg)
Перепечатка материалов допускается с письменного разрешения «учреждение «Редакция газеты «Зара над Нёманам».
Назад