26 сентября 2025 — 10:57
Па масавасці такога свята даўно не было ў Вялікіх Азёрках. Яго адзначылі тут шырока, узнёсла, прыгожа.
Дзень народнага адзінства ў аграгарадку пачаўся з урачыстай лінейкі, якая была праведзена ля праўлення КСУП «Азяранскі». У ёй прынялі ўдзел дырэктар сельгаспрадпрыемства Станіслаў Зенкевіч, старшыня Курылавіцкага сельвыканкама Сяргей Каспяровіч, спецыялісты, мясцовыя жыхары.
На свяце выступілі шаноўныя госці, а таксама дырэктар школы Валянціна Мармыш. Вядучыя К. Скаскевіч і Н. Сутырка паведамілі ўсім прысутным пра дасягненні нашай краіны, пра тое, як важна быць усім разам. Вучні школы, якім споўнілася 14 гадоў, атрымалі ганаровую кнігу «Я – грамадзянін Рэспублікі Беларусь».
Удзельнікі свята ўсклалі кветкі да помніка-абеліска загінуўшым землякам у Вялікіх Азёрках.
Пасля лінейкі свята працягвалася ў школе. Вучні пачатковых класаў расказалі аб тым, як яны любяць сваю школу, вёску, нашу краіну Беларусь, вучні старэйшых класаў разам са сваімі класнымі кіраўнікамі Т. А. Галавач і С. М. Асцюкевіч вялі дыялог пра сяброўства, патрыятызм, нацыянальныя каштоўнасці. Вучні 6-9 класаў выказалі ўпэўненасць, што Беларусь – гэта кожны з нас, і сёння мы ствараем нашу будучыню.
Свята завяршылася сумесным аўтавелапрабегам па аграгарадку Вялікія Азёркі. Калону ўзначаліў асабісты аўтамабіль Валянціны Мармыш з Дзяржаўным сцягам Рэспублікі Беларусь. Свята прадэманстравала згуртаванасць і адзінства людзей, іх гатоўнасць аддаць свае сілы для далейшага росквіту малой радзімы.
Станіслаў ЗВЯРОВІЧ
Фота прадастаўлена Курылавіцкім сельвыканкамам
Перепечатка материалов допускается с письменного разрешения «учреждение «Редакция газеты «Зара над Нёманам».
Назад