25 мая 2019 — 20:06
Фінал абласнога этапу рэспубліканскага конкурса юных чытальнікаў “Жывая класіка” праходзіў у абласным Палацы творчасці дзяцей і моладзі. Удзельнічалі ў ім навучэнцы чатырох узроставых груп: 1-4 класы, 5-6 класы, 7-8 класы, 9-10 класы.
Кожны з рабят – пераможца раённага этапу конкурса. Яны выдатна паказалі сваё майстэрства выразна і артыстычна чытаць са сцэны творы беларускіх пісьменнікаў. Лепшых з лепшых для фінала абласнога этапу выбіралі паводле відэаматэрыялаў з выступленнямі.
“Жывая класіка” – гэта не проста конкурс, а сапраўднае свята жывога слова, якое прывівае цікавасць да чытання на лепшых прыкладах нацыянальнай культуры. Падчас фінала абласнога этапу са сцэны гучалі вершы беларускіх класікаў – Якуба Коласа, Янкі Купалы, Пімена Панчанкі, Уладзіміра Караткевіча, а таксама творы сучасных паэтаў.
Адкрыла творчае спаборніцтва самая малодшая ўдзельніца навучэнка гімназіі №2 Гродна Марыя Ускова вершам пра свой родны горад Гродна. Тэму малой радзімы прадоўжыла навучэнка сярэдняй школы №17 Ліды Валерыя Лабанава творам “Бацькоўская хата”.
Журы ў першую чаргу ацэньвала шчырасць дзяцей.
Юныя чытальнікі вельмі адказна рыхтаваліся да выступлення – падбіралі адпаведныя касцюмы і неабходны рэквізіт. Радок за радком лілася са сцэны мілагучная родная мова.
Па выніках адзнак журы ў кожнай узроставай катэгорыі атрымалася некалькі другіх і трэціх месцаў. Лепшыя чытальнікі прадставяць Гродзеншчыну падчас рэспубліканскага паўфінала, які пройдзе ў чэрвені ў Мінску.
Перепечатка материалов допускается с письменного разрешения «учреждение «Редакция газеты «Зара над Нёманам».
Назад