Свята-Троіцкі касцёл у Струбніцы: адновім святыню разам

Шаноўныя мастаўчане!

Адной з візітных карткаў Мастоўскага раёна з’яўляецца Свята-Троіцкі касцёл в.Плябанаўцы (аг.Струбніца), які пабудаваны ў 1740 годзе. Гэта архітэктурны помнік драўлянага дойлідства з элементамі барока.

З усіх гісторыка-культурных каштоўнасцей Мастоўскага раёна Свята-Троіцкі касцёл адзіны мае катэгорыю “2” матэрыяльнай гісторыка-культурнай каштоўнасці, з’яўляецца помнікам агульнарэспубліканскага значэння.

Яго адметныя духоўныя, мастацкія і дакументальныя вартасці маюць нацыянальную значнасць. У склад помніка ўваходзяць яшчэ асобныя каштоўныя элементы дэкаратыўнага аздаблення інтэр’ера: тры алтары, роспіс, арган.

Варта звярнуць увагу на браму, якая знаходзіцца пры ўваходзе ў касцёл. На вялікі жаль, яна паступова разбураецца, у апошні час гэта адбываецца вельмі хутка. І калі цяпер не прыняць пэўных дзеянняў, то аднавіць яе потым не будзе магчымасці.

Зараз у Свята-Троіцкім касцёле служыць неабыякавы святар, які таксама вельмі перажывае за тое, каб наша спадчына не згінула. Ім адкрыты ў Беларусбанку дабрачынны разліковы рахунак для правядзення рамонтных работ.

Каб пачаць рамонтныя работы, неабходна распрацаваць будаўнічы праект, які каштуе каля 3000 рублёў.

Кожны цывілізаваны і культурны народ павінен праяўляць клопат аб захаванні гісторыка-культурных каштоўнасцей ў інтарэсах цяперашняга і будучага пакаленняў.

Звяртаемся да вас, паважаныя жыхары Мастоўскага раёна, давайце разам збяром неабходную суму і адновім святыню. Лёс нашай спадчыны ў нашых руках!

Разліковы рахунак касцёла Святой Тройцы аг. Струбніца Мастоўскага раёна: BY24AKBB31350000415084000000 БИК AKBBBY21400  УНН 500126714

Дзейкало Сяргей Сяргеевіч, начальнік аддзела ідэалагічнай работы і па справах моладзі Мастоўскага райвыканкама

Перепечатка материалов допускается с письменного разрешения «учреждение «Редакция газеты «Зара над Нёманам».