20 июня 2022 — 11:22
Доўгачаканае лета дазваляе дзяўчынкам і хлопчыкам з задавальненнем атрымліваць асалоду ад канікул. І калі малодшыя школьнікі з галавой акунуліся ў бесклапотны свет гульняў і прыгод, то навучэнцы старэйшых класаў Пескаўскага дзіцячага сада – сярэдняй школы вырашылі для сябе, што летнія канікулы – гэта час, калі можна сумясціць прыемнае з карысным: і адпачыць, і зарабіць першыя ўласныя грошы. Такую магчымасць падлеткам даюць працоўныя быгады. Дарэчы, многія з дзяцей ужо працавалі ў брыгадзе мінулым летам.
Сёлета працоўная брыгада аб’яднала 14 навучэнцаў ад 14 да 16 гадоў. На працягу 8 працоўных дзён выхаванцы будуць працаваць на базе нашай установы адукацыі, змогуць адчуць сябе ў якасці сапраўдных работнікаў і, вядома ж, заробяць грошы. Працаваць мы ўжо пачалі! Навучэнцы прапалолі бульбу, буракі, цыбулю, клумбы з кветкамі.
Большая частка работ брыгады накіравана на добраўпарадкаванне і афармленне тэрыторыі школы. Выхаваць прыгожую асобу можна толькі тады, калі вакол яе ўсё прыгожа. Чалавек адчувае сябе камфортна, калі яго акружаюць чыстыя алеі, квітнеючыя газоны і ярка аформленыя клумбы кветак. Наперадзе добраўпарадкаванне стадыёна, тэрыторый каля замацаваных помнікаў, а таксама ачыстка ад зеляніны і моху жалезабетоннага плота вакол школы і праца ў школьнай цяпліцы.
У нашы планы ўваходзіць і структураванне бібліятэчнага фонду.
Праца ў брыгадзе, вядома, спрыяе выхаванню ў падлеткаў ініцыятывы, дакладнасці, акуратнасці, настойлівасці, дысцыплінаваных паводзін у калектыве. Хочацца адзначыць, што юнакі і дзяўчаты з вялікім жаданнем працуюць у складзе працоўнай брыгады, так як тут яны атрымліваюць магчымасць зарабіць, замацаваць прафесійна-працоўныя навыкі, якія спатрэбяцца ім у будучыні, вучацца разам несці адказнасць за атрыманы вынік. Юнакам і дзяўчатам вельмі прыемна, што яны здольны прынесці карысць школе, вёсцы, сям’і, сабе, грамадству, краіне.
Кожны дзень пасля працы любімым месцам усіх дзяўчынак і хлопчыкаў стала пляцоўка адпачынку на школьным стадыёне. Пасля працоўнага дня тут збіраемся ўсе разам, і кожны знаходзіць для сябе занятак па душы, гэта і мастацкая самадзейнасць, і спартыўныя гульні. Падчас сустрэч мы арганізоўваем розныя флэшмобы і музычныя конкурсы. На пляцоўку прыходзяць і іншыя дзеці нашай школы.
І можна не сумнявацца, што пасля добрасумленнай працы і актыўнага адпачынку падлеткі будуць ведаць цану грошай і цану сапраўднага сяброўства і больш паважліва ставіцца да чужой працы, бо летняя працоўная дзейнасць іх гэтаму абавязкова навучыць.
Галіна ГАЛАВЕНКА,
класны кіраўнік 10 класа
Пескаўскага дзіцячага сада – сярэдняй школы
Перепечатка материалов допускается с письменного разрешения «учреждение «Редакция газеты «Зара над Нёманам».
Назад