Паход сапраўдных сяброў

Самыя яркія ўражанні ў дзяцей застаюцца тады, калі яны разам з бацькамі ездзяць адпачываць. Дзеці з захапленнем будуць распавядаць сваім сябрам аб тым, дзе яны былі, што бачылі, як збіралі грыбы і ягады, як купаліся ў рацэ. Ніякі мультфільм, ніякая казка не заменяць уласных уражанняў, уласнай жывой думкі, уласнага ўважлівага позірку і ўласных дзеянняў. У сямейным паходзе дзеці адчуваюць сваё дачыненне да агульнай справы, бачаць, якую карысць яны прыносяць. Менавіта ў паходзе ўзнікае духоўны кантакт, пра які многія бацькі толькі мараць. А ўжо калі гэта сямейны паход цэлага класа ...

Нашаму класу вельмі пашанцавала. У нас ёсць натхніцель і ажыццяўляльнік ідэй - класны кіраўнік Алена Мікалаеўна Бергель, якая ўмее вызначыць найбольш прымальныя формы арганізацыі адпачынку. Заўсёды падыходзіць да гэтага пытання з выдумкай, фантазіяй, умее разам з дзецьмі і бацькамі скласці цікавую аздараўленча-забаўляльную праграму сумеснага адпачынку. Дзеці ў яе заўсёды галоўныя асобы гэтай праграмы і вырашаюць самыя адказныя пытанні. У нашым выпадку яны праяўляюць максімум ініцыятывы і творчасці. І кожны год, вось ужо на працягу 3 гадоў, мы, бацькі, і нашы дзеці адпраўляемся ў падарожжа па роднай краіне ў пачатку летніх канікул. Гэта і паездкі, і экскурсіі, і проста вячоркі. У гэтым годзе найбольш універсальным відам актыўнага адпачынку для ўсіх, мы палічылі, будзе турыстычная прагулка з начоўкай. 

Адпраўляючыся з сябрамі на адпачынак у лес, на Волпенскае вадасховішча, мы назапасіліся вясёлымі гульнямі, у якія змаглі гуляць разам дарослыя і дзеці. І наш адпачынак ператварыўся не толькі ў паглынанне шашлыка, а стаў чымсьці вялікім, сапраўдным святам зносін бацькоў і дзяцей, якое абавязкова запомніцца. І яго захочацца паўтарыць ...

А ці не правесці нам эстафету? Для яе цалкам падыдзе нават няроўная лясная дарожка. Спачатку мамы і таты пераадольвалі дыстанцыю, паказваючы дзятве спосаб перамяшчэння, а потым і самі дзеці ўступілі ў гульню. І самае галоўнае, ведаючы, што паражэнне бацькоў дае ім права на перамогу - дзеці з такім азартам падтрымлівалі мам і тат, так перажывалі іх прамашкі ...
А гульня ў “кошкі-мышкі”. Гэта старадаўняя гульня вельмі лёгкая і вясёлая, і калі дачка “Кошка” спрабуе прарвацца ў круг і злавіць тату “Мышку”, а ўсе спрабуюць ёй перашкодзіць, не прапусціць - незабыўная весялосць вам гарантавана! 

“Казакі-разбойнікі”, “Бой з падушкамі”, “Знаходжанне скарбу”, “Угадай героя” і шмат іншых. Набегаўшыся, наскакаўшыся і наеўшыся шашлыкоў, самы час адпачыць і пасядзець усёй сумленнай кампаніяй вакол вогнішча. Выдатна, што і тут праяўляецца ўменне педагога, і ў руках дзяцей і дарослых з’яўляюцца лісткі са словамі простых, але вядомых яшчэ з дзяцінства і нам песень. А яшчэ ёсць і свой умелец-гітарыст! І пачынаецца канцэрт з успамінамі ...

А мілая дзіцячая гульня ў “садоўніка”, у якую добра гуляць менавіта так, пасеўшы кругам. І, нягледзячы на наўяўную немудрагелістасць, яна вельмі карысная: развівае ўвагу, вучыць засяроджанасці. 

Адпачынак ля вады выдатны ўжо сам па сабе. Колькі радасці выклікае ў дзятвы магчымасць калі не паплюхацца ў пяску (у дадзеным выпадку з-за ўмоў надвор’я), то пакатацца на надзіманай лодцы!

 І менавіта такі адпачынак: загадзя спланаваны, прадуманы і накіраваны на атрыманне задавальнення бацькамі і дзецьмі ад сумеснага змястоўнага баўлення часу.

С. Шчарбіна,
маці адной з вучаніц,
намеснік дырэктара па выхаваўчай рабоце ДУА “Гудзевіцкая сярэдняя школа”
 

Перепечатка материалов допускается с письменного разрешения «учреждение «Редакция газеты «Зара над Нёманам».