20 июля 2015 — 10:00
Не даюць сумаваць мясцовым вяскоўцам работнікі Азёркаўскага сельскага клуба. Нядаўна ў Вялікіх Азёрках з песнямі і жартамі прайшло Купалле. А ў мінулую нядзелю жыхары Букштава сабраліся на свята сваёй вёскі.
У цэнтры вёскі на вуліцы, дзе праводзілася свята, сабраліся амаль усе яе жыхары. Не прыйшлі толькі тыя, хто па прычыне ўзросту і хваробы не мог падняцца з ложка. Вясковая вуліца на некоторы час напоўнілася даўно забытым дзіцячым смехам. Гэта на свята да бабуляў і дзядуляў з’ехаліся ўнукі са сваімі бацькамі.
Каб прывітаць вяскоўцаў, завітаў на свята старшыня Курылавіцкага сельскага Савета Сяргей Валяр’янавіч Каспяровіч. Задушэўнымі мілымі песнямі на працягу дзвюх гадзін вітаў вяскоўцаў і ствараў ім адпаведны святочны настрой вакальны гурт “Азяраначка”, у саставе якога здольнасці дэманстравалі Галіна Шалястовіч, Ірына Шалястовіч, Алена Чудзілоўская, Алена Боцька, Валянціна Мармыш, Іна Жыткевіч з дачкой Наталляй, якая цяпер вучыцца ў Гродна, а ў родную вёску прыязджае, каб з задавальненнем прыняць удзел у мастацкай самадзейнасці, дзяўчына актыўна ўдзельнічае ва ўсіх культурных мерапрыемствах. Стараюцца не адстаць ад старэйшых артыстаў і Ксенія Шалястовіч, Крысціна Тур, Юлія Мойса, Валерыя Драздова, вучні Азёркаўскай школы, актыўныя ўдзельніцы “Азяраначкі” і ўсіх вясковых святаў. Ксенія Шалястовіч яшчэ прыемна ўразіла букштаўцаў і гасцей задорным цыганскім танцам.
Абаяльная вядучая Ірына Шалястовіч знайшла душэўныя і добрыя словы для кожнага вяскоўца. Гэта сёння яны амаль усе на заслужаным адпачынку, а раней паляводы, жывёлаводы, механізатары, будаўнікі шчыравалі на калгасных палетках і фермах, будавалі дамы, гадавалі і адпраўлялі ў вялікі свет дзяцей. Гэта сёння ў Букштаве амаль не чуваць дзіцяга смеху. А раней у кожнай хаце гадавалася па чацвёра, а то і больш дзяцей.
Мнагадзетным мамам, а сёння ўжо бабулям і нават прабабулям Марыі Андрэеўне Халецкай, Марыі Вікенцьеўне Траян, якія выгадавалі і выхавалі сем і шэсць дзяцей, і іншым жанчынам вядучая сказала шчырыя словы ўдзячнасці за іх мацярынскі подзвіг, а артысты падарылі песні. Хвілінай маўчання вяскоўцы, артысты і госці ўшанавалі памяць ветэранаў Вялікай Айчыннай вайны. На жаль, іх ужо нікога ў вёсцы не засталося ў жывых...
Добрым словам успомнілі вясковых доўгажыхароў Антаніну Антонаўну Чудзілоўскую, Марыю Сцяпанаўну Мазоль, Яўгенію Пятроўну Маліноўскую, якія ўжо перайшлі свой 90гадовы жыццёвы рубеж, пажадалі ім здароўя. А самую маленькую ўдзельніцу свята 4хгадовую Надзею Сутырка шчодра пачаставалі цукеркамі.
Пакуль спявалі песні, танцавалі, удзельнічалі ў конкурсах, гульнях, кожны з прысутных на свяце ў думках вяртаўся ў сваё маленства і юнацтва, Дзе б чалавек ні апынуўся пазней, але яго заўсёды вабіць да сябе малая радзіма, дзе на ўзгорку бярозка так ветліва свеціць, а над рэчкай дзявочыя песні так міла гучаць...
Напрыканцы свята Леакадзія Канстанцінаўна Папянюк ад імя ўсіх жыхароў Букштава падарыла артыстам букеты рамонкаў.
Дзякуй, што вы стварылі нам цудоўны настрой, вярнулі на некаторы час у маладосць, дапамаглі разнастаіць і ўпрыгожыць наша будзённае вясковае жыццё, шчыра дзякавала жанчына артыстам і арганізатарам свята вёскі. Я. ЦЕСЛЮКЕВІЧ Фота К. ТУР
Перепечатка материалов допускается с письменного разрешения «учреждение «Редакция газеты «Зара над Нёманам».
Назад