20 января 2019 — 09:06
Музычны лялечны спектакль пад такой назвай быў прадстаўлены ўвазе гледачоў у літаратурнай гасцёўні ДУК “Мастоўская раённая бібліятэка”. Яго падрыхтавалі ўдзельнікі ўзорнага дзіцячага лялечнага тэатра “Петрушка” пад кіраўніцтвам Г.І Васілеўскай.
Прэм’ера пастаноўкі адбылася напярэдадні Каляд. Яе першымі гледачамі сталі хлопчыкі і дзяўчынкі, што адпачывалі ў прышкольных лагерах. А ў гэты студзеньскі дзень на спектакль былі запрошаны выхаванцы цэнтра карэкцыйна-развіваючага навучання і рэабілітацыі, а таксама аддзялення дзённага знаходжання для інвалідаў ЦСАН.
- Работа над пастаноўкай доўжылася на працягу амаль трох месяцаў, - расказвае Галіна Іосіфаўна. – Дзесяць юных акцёраў карпатліва працавалі над стварэннем яркіх вобразаў, старанна вучылі свае ролі, рыхтаваліся лялькі, дэкарацыі і касцюмы. Дапамогу ў гэтым аказвала мастак-пастаноўшчык В.В. Струк. Стала ўжо добрай традыцыяй у перыяд свята Ражства Хрыстова ставіць спектакль, прысвечаны каляднай тэматыцы, і гэты год не стаў выключэннем.
… І вось глядзельная зала запаўняецца гукамі чароўнай музыкі. Лялькі ў руках умелых акцёраў ажываюць і пачынаюць расказваць цікавую калядную гісторыю. З першых хвілін пастаноўка, сюжэт якой быў напісаны па матывах народных казак, захапіла ўвагу ўсіх прысутных у зале. Разам з галоўнымі героямі гледачы апынуліся ў казачным лесе, дзе разгарнулася асноўнае дзейства. Тут маленькая дзяўчынка-сірата засталася зусім адна ў Калядную ноч. Але лясныя звяры не далі ёй сумаваць…
Гэты спектакль стаў дэбютам для трох юных мастаўчанак - Дар’і Цыбульскай, Паліны Суржэнка і Варвары Лазарэнка. Іх першыя крокі ў тэатральным мастацтве аказаліся паспяховымі. А вось вучаніца 8 “Б” класа пятай гарадской школы Таццяна Лазарэнка з’яўляецца ўдзельніцай узорнага дзіцячага лялечнага тэатра ўжо напрацягу чатырох гадоў.
- Раней тут займалася мая старэйшая сястра, якая зараз вучыцца ў каледжы, - дзеліцца эмоцыямі дзяўчынка. – Яе прыклад стаў для мяне штуршком, каб паспрабаваць свае сілы на сцэне. Дарэчы, акрамя гэтага калектыву, я наведваю і музычную школу, спяваю ў царкоўным хоры. Заняткі тэатральным мастацтвам дапамагаюць мне ўпэўнена трымацца перад аўдыторыяй.
Выдатна справіліся са сваімі ролямі Антон Рубцэвіч і Вадзім Лагарэнка. Юнакі з’яўляюцца ўдзельнікамі калектыву вось ужо чатыры гады.
- Тэатр – унікальны від мастацтва, - адзначаюць Антон і Вадзім. – Калі чуеш апладысменты ўдзячных гледачоў, адчуваеш вялікую асалоду і радасць. Тут мы выпрацоўваем у сабе многія важныя ўменні і навыкі, а таму займацца ў гэтым калектыве – адно задавальненне.
У гэтым перакананы і іншыя ўдзельнікі калектыву: Юлія Венская, Наталля Малая, Валерыя Салалайка, Маша Бабіч.
Захапляльная гісторыя, якая здарылася ў Калядную ноч з дзяўчынкай-сіратой, мае глыбокі сэнс. Яна яшчэ раз нагадала ўсім прысутным аб неабходнасці рабіць добрыя ўчынкі, быць шчырымі і прыходзіць адзін аднаму на дапамогу. У той час, калі за вокнамі дзьмуў халодны зімовы вецер, у літаратурнай гасцёўні было цёпла ад шчырых усмешак і бурных апладысментаў.
Фінальным акордам творчай сустрэчы сталі вершы, прысвечаныя гэтаму светламу святу. Іх прачытанне ўдзельнікамі калектыву кранула самыя патаемныя струны душы кожнага прысутнага ў зале.
- Нашы выхаванцы – частыя госці ў раённай бібліятэцы, - расказвае настаўнік ЦКРНіР Т.К. Скарабагатая. – У гэтыя светлыя дні цудоўная “Калядная гісторыя” прымусіла ўсіх нас яшчэ раз задумацца аб неабходнасці праяўляць лепшыя маральныя якасці. Пастаноўка падарыла многа станоўчых эмоцый і дзецям, і дарослым.
В.ЦІШКО
Фота аўтара
Перепечатка материалов допускается с письменного разрешения «учреждение «Редакция газеты «Зара над Нёманам».
Назад