14 августа 2025 — 08:18
У мінулую суботу ў аграгарадку Масты Правыя было шумна і весела – тут ладзілася брэндавае свята. Сямейны фестываль “Масты яднаюць берагі і лёсы” сабраў у якасці актыўных удзельнікаў і ўдзячных гледачоў не толькі мясцовых жыхароў, але і шмат іншых гасцей, што завіталі да родных у выхадны дзень.
Свята атрамалася вельмі музычным, душэўным і вясёлым. Шчырыя зычэнні адрасавалі вяскоўцам старшыня Мастоўскага сельсавета Людміла Рагацэвіч і настаяцель храма Мікалая Цудатворца аг. Пескі айцец Віктар Шнайдар. Прыгожыя песні для жыхароў і гасцей аграгарадка прагучалі ў выкананні творчых калектываў Правамастоўскага цэнтра вольнага часу і культуры, а таксама іх калег з Гудзевіч, Курылавіч і Мікелеўшчыны.
Самыя дапытлівыя і смелыя ўдзельнікі святочнага мерапрыемства пабывалі на незвычайнай экскурсіі: з вуліцамі аграгарадка яны знаёміліся… пад стук капытоў, верхам на кані.
Адным з самых хвалюючых момантаў фестывалю стала ўшанаванне мясцовых сем’яў, лёсы якіх злучыў мост праз раку Нёман. Хтосьці з іх жыў у Левых Мастах, а хтосьці – у Правых. Мост ці нейкія вышэйшыя сілы аб’ядналі іх жыцці ў адно цэлае. І такіх набралася аж 19 сямейных пар, якія праз гады пранеслі сваё першае пачуццё, сталі адзін для аднаго моцнай апорай, пабудавалі хаты, гадуюць дзяцей, унукаў і дбаюць пра шчаслівую будучыню.
На вясковае свята завіталі сем’і Здановіч, Жаброўскіх, Варсовіч, Балтрукевіч, Севасцьяновіч, Арціш, Курапацкіх, Каскевіч і інш.
– Наша сям’я нарадзілася ў 2009 годзе, а першае спатканне адбылося якраз на мосце. Так што можна лічыць, што менавіта гэтае інжынернае збудаванне стала месцам адліку нашай сямейнай гісторыі, – расказваюць Святлана і Сяргей Балтрукевічы.
У іх дружнай сям’і падрастае трое дзетак, сыны Данііл і Дзмітрый, дачка Аліна, радуюць бацькоў сваімі поспехамі і дасягненнямі. У свой час Балтрукевічы станавіліся прызёрамі конкурсу “Сям’я года”.
Удзельнікі сямейнага фестывалю ў Правых Мастах упэўнены, што сям’я – гэта самае каштоўнае багацце ў жыцці, якое трэба шанаваць, берагчы і памнажаць.
Наталля ШЭЎЧЫК
Фота прадастаўлена Мастоўскім РЦК
Перепечатка материалов допускается с письменного разрешения «учреждение «Редакция газеты «Зара над Нёманам».
Назад