Экскурсію на мемарыяльны комплекс “Шымкі” здзейснілі вучні Пескаўскай СШ

Дзеці, якія  адпачывалі ў аздараўленчым лагеры “Экаландыя” Пескаўскай сярэдняй школы,  разам з настаўнікамі наведалі мемарыяльны комплекс загінуўшым воінам і партызанам ля вёскі “Шымкі”. Мемарыяльны комплекс – гэта помнік-сімвал Мастоўшчыны.  

Мемарыял ахвярам фашызму ўвекавечыў памяць больш як 3000 жыхароў Мастоўскага раёна, якія загінулі ў гады Вялікай Айчыннай вайны.

Для  хлопчыкаў і дзяўчынак важна пабываць на месцах баёў у гады Вялікай Айчыннай вайны, дакрануцца да памяці аб загінуўшых воінах і партызанах,  паслухаць аповед аб іх мужнасці і гераізме.  Дзеці пачулі пра барацьбу партызан, якія базіраваліся ў Ліпічанскай пушчы, пра спаленыя вёскі Мастоўшчыны, пра тое, якія помнікі ўзвялі ўдзячныя нашчадкі загінуўшым абаронцам Радзімы. Рабяты пабывалі ў партызанскай зямлянцы, пазнаёміліся са змешчанымі там экспанатамі, убачылі партрэты камандзіраў, прачыталі, якія атрады тут базіраваліся.

Немцы прыклалі шмат сіл, каб выбіць партызан з пушчы і захапіць яе, але ім гэта не ўдалося. Падчас адной з карных аперацый была спалена дашчэнту і сама вёска Шымкі.

Старажылы памятаюць, як немцы знішчылі драўляную царкву, якая стаяла на беразе Шчары, і застрэлілі святара. Праз некаторы час на тым месцы выбілася крыніца. Зараз яна добраўпарадкавана і намолена. Дзеці папілі  крыштальна чыстай вады.

Гонар. Павага. Будучыня. Менавіта так можна апісаць нашы пачуцці і думкі на мемарыяльным комплексе  ля в. Шымкі. Гонар за нашу вялікую гісторыю. Павага да людзей, да ветэранаў, якія здабылі Вялікую Перамогу. А будучыню павінны ствараць мы. Дастойную будучыню роднай краіны, у якой людзям хочацца жыць, працаваць, выхоўваць дзяцей. Аб гэтым марылі тыя, хто аддаў сваё жыццё ў ваенныя саракавыя, і тыя, хто адраджаў мірнае жыццё.

Памяць пра тыя гады  свяшчэнна. Менавіта яна дапамагае нам не дапускаць трагічных памылак, а рэальна ацэньваць пагрозу і атрымліваць сур’ёзныя ўрокі мінулага. У гады Вялікай Айчыннай вайны нашы дзяды і прадзеды былі адным цэлым у імкненні перамагчы ворага. Для нас, рашаючых сёння мірныя, але няпростыя задачы, гэта павінна служыць натхняючым прыкладам. Толькі разам, толькі аб’яднаўшы намаганні для дасягнення мэты, можна захаваць мір. Мы абавязаны захоўваць і шанаваць мір, памнажаць магутнасць нашай Радзімы карыснымі справамі.

 Галіна  ГАЛАВЕНКА, настаўнік рускай мовы і літаратуры Пескаўскай сярэдняй школы  

Оперативные и актуальные новости в нашем Telegram-канале

Подписывайтесь по ссылке

#образование #мемориал #Мостовщина

Перепечатка материалов допускается с письменного разрешения «учреждение «Редакция газеты «Зара над Нёманам».