Дзіцячыя і маладзёжныя ініцыятывы Мастоўшчыны

Як убачыць, падтрымаць, стымуляваць і развіваць дзіцячую і маладзёжную ініцыятыву, накіраваную на творчасць, фарміраванне асобы дзіцяці, пошук новых шляхоў супрацоўніцтва з дарослымі? Зацікаўлены дыялог, абмен думкамі і вопытам на гэты конт ішоў падчас абласнога семінара, што быў арганізаваны на базе Мастоўскага раёна.

Яго ўдзельнікамі сталі кіраўнікі метадычных аб’яднанняў педагогаў-арганізатараў, метадысты ўстаноў дадатковай адукацыі дзяцей і моладзі, а таксама раённых метадычных кабінетаў. У рабоце семінара, які ладзіўся на пляцоўках раённага цэнтра творчасці дзяцей і моладзі і пятай гарадской школы, прынялі ўдзел намеснік начальніка ўпраўлення адукацыі райвыканкама Іна Балтрукевіч, галоўны спецыяліст упраўлення Людміла Маскевіч, першы сакратар райкама БРСМ Павел Зябліцаў.

Як адзначыла метадыст аддзела ідэалагічнай і выхаваўчай работы Гродзенскага абласнога інстытута развіцця адукацыі Людміла Бірукова, выбар на Масты выпаў невыпадкова.

- Тут ёсць свой адметны почырк, маюцца свае погляды і цікавыя праекты, якія ўжо актыўна рэалізуюцца, - падкрэсліла Людміла Леанідаўна. Хутка прадстаўнікі метадычных служб вобласці ў гэтым змаглі пераканацца і самі.

Дзіцячыя і маладзёжныя ініцыятывы – гэта самыя розныя накірункі дзейнасці грамадскіх дзіцячых арганізацый, дзесяткі штогадовых мерапрыемстваў і мноства надзвычайных ідэй. Напрыклад, стварыць музей гісторыі першай пазашкольнай установы Мастоўскага раёна, які адчыніў свае дзверы ў раённым цэнтры творчасці дзяцей і моладзі ў 2008 годзе. А праз некаторы час на яго базе арганізаваць этнаграфічны куток, экспанаты для якога сабралі гуркоўцы падчас этнаграфічных экспедыцый.

Ці, можа, разам з гудзевіцкімі рабятамі стаць удзельнікам сацыяльнага праекта па збору адпрацаваных батарэек. Або “вырасціць” Дрэва ідэй, як гэта зрабілі акцябраты і піянеры піянерскай дружыны Лунненскай сярэдняй школы імя Героя Савецкага Саюза Івана Шарамета. На яго “галінках” рабяты размяшчаюць свае ініцыятывы і пажаданні аб правядзенні акцый і мерапрыемстваў, расказваюць пра тое, што цікавага адбылося ў іх атрадзе ці пярвічцы.

Зірнуць па-новаму на юных жыхароў раёна дазволілі яркія, дынамічныя і эмацыяльныя выступленні агітбрыгад піянераў і членаў БРСМ гімназіі №1 і Лунненскай школы, творчая візітка “Мы – дзеці Мастоўшчыны”, піянерскі чарлідынг “Разам са сваёй краінай”.

Пасля творчых прэзентацый ўдзельнікі семінара былі запрошаны на форум ініцыятыў. Так, кемлівасць і лагічнае мысленне спатрэбіліся дзецям і дарослым, каб сумесна разгадаць рэбусы і прайсці этапы вэб-квэста “Заваявальнікі вяршынь”. Станоўчыя эмоцыі выклікала праграма “Збаўляльная магія” – перспектыўная методыка садзейнічання фізічнай і псіхічнай рэабілітацыі людзей з абмежаваннямі. Разам з валанцёрамі клуба ЮНЕСКА “Амега”, якія выкарыстоўваюць дадзеную методыку ў сваёй дзейнасці, ўсе на некаторы час сталі сапраўднымі фокуснікамі. Навыкі рукадзелля спатрэбіліся гасцям, каб разам з цімураўцамі сваімі рукамі зрабіць невялічкія падарункі, што на надыходзячыя навагоднія святы парадуюць дзяцей з сацыяльнага прытулка ці шматдзетнай сям’і.

Таксама ўдзельнікі семінара сталі сведкамі пасяджэння савета прадстаўніцтваў Маладзёжнага парламента, дзе быў распрацаваны каляндарны план перадвыбарнай праграмы дэпутата Вадзіма Здановіча на 2019 год “Праяві сябе і ўпішы сваё імя ў гісторыю малой радзімы”. А ў завяршэнне работы сумеснымі намаганнямі прадстаўнікоў прэс-цэнтра Правамастоўскай сярэдняй школы аператыўна было выпушчана прылажэнне да іх школьнага друкаванага выдання з матэрыяламі семінара. Адзначым, што газета ў названай школе выходзіць штомесяц з 2009 года. І гэта яшчэ адна ініцыятыва, якая фарміруе творчую актыўнасць і самастойнасць рабят.

Як было трапна заўважана адным з выступаючых, ініцыятыва пачынаецца з ідэі. Адна ідэя так і застанецца юё, калі не будзе матывацыі па яе рэалізацыі. І менавіта дарослыя павінны даць маладому пакаленню правільныя арыентыры для гэтага. Будучае – час тых, хто сёння гатовы ўспрымаць зменлівы свет і развівацца сам.

Мовай лічбаў

У нашым раёне налічваецца 15 піянерскіх дружын і столькі ж пярвічак БРСМ, у якіх актыўна развіваецца валанцёрскі і цімураўскі рух. Дзейнічае 12 антынаркатычных атрадаў, 13 атрадаў юных інспектараў руху, 11 атрадаў юных выратавальнікаў і пажарных. Функцыянуюць 2 маладзёжныя атрады аховы правапарадку, 10 атрадаў юных памочнікаў міліцыі, 3 атрады Чырвонага Крыжа і 8 школьных прэс-цэнтраў.

Н.ШЭЎЧЫК

Фота аўтара

Перепечатка материалов допускается с письменного разрешения «учреждение «Редакция газеты «Зара над Нёманам».