01 июня 2020 — 09:09
Жыццё пражыць – не поле перайсці. У бясспрэчнасці гэтай народнай мудрасці не сумняваецца, напэўна, ніхто. У кожнага чалавека на яго жыццёвым шляху здараюцца і радасці, і беды, і перамогі, і выпрабаванні… Галоўнае – не збочыць, ісці па гэтым шляху годна.
Таму заўсёды па-добраму зайздросціш тым, у каго за плячыма не адзін дзясятак гадоў, а аўтарытэт і павага заслужаныя.
Усё вышэйсказанае трэба памножыць на два, калі гаворка ідзе пра сям’ю, гісторыя якой налічвае ўжо сорак пяць гадоў.
23 мая 1975 года маладыя і прыгожыя Казімір Францавіч Ашмяна і Ніна Вікенцьеўна Дудко пабраліся шлюбам. Выгадаваныя ў вёсцы, добра ведалі сялянскую працу, вясковы лад жыцця, таму не дзіўна, што менавіта з вёскай звязалі свой далейшы лёс. У 1977 годзе прыехалі ў Гудзевічы і больш за 30 год аддалі працы ў мясцовай гаспадарцы. Казімір Францавіч заўсёды быў на добрым рахунку і ў кіраўніцтва, і ў аднавяскоўцаў як ветэрынарны ўрач, а Ніна Вікенцьеўна працавала бухгалтарам да 2008 года.
Але самае галоўнае, як і ў кожнай сям’і, гэта дзеці. Радасцю і ўцехай для бацькоў сталі дочкі Ірына, Таццяна і Святлана. Зараз кожная з іх мае сваю сям’ю, а ў нашых юбіляраў падрастае чацвёра ўнукаў. І пад бацькоўскім дахам усе збіраюцца з вялікай ахвотай, бо шчырыя і цёплыя адносіны Казіміра Францавіча і Ніны Вікенцьеўны ствараюць атмасферу ўтульнасці і абароненасці, дабра і любові. Сваім прыкладам сямейных адносін яны вучаць моладзь шанаваць адно аднаго, быць апорай і падтрымкай, тады і шлях у сорак пяць сумесных гадоў будзе лёгкім і светлым. Жадаем нашым юбілярам моцнага здароўя, аптымізму, бадзёрасці і абавязкова яшчэ большым колам родных і блізкіх адзначыць залатое вяселле!
Кацярына БАСІНСКАЯ,
старшыня Гудзевіцкага сельсавета
Перепечатка материалов допускается с письменного разрешения «учреждение «Редакция газеты «Зара над Нёманам».
Назад