Настолка і самы маштабны квэст: забаўляльны складнік Дня беларускага пісьменства

Як падкрэсліў падчас прэс-канферэнцыі, што адбылася ў Мінску, намеснік міністра інфармацыі Беларусі Ігар Бузоўскі, на Дні беларускага пісьменства вельмі важна зацікавіць самых розных гасцей. Таму праграма вельмі насычаная, рознабаковая і абяцае шмат цікавостак.

 

 

Да прыкладу, падчас адкрыцця новай кнігарні будзе прэзентавана настолка “Таямніцы старадаўняга скрыпторыя”. Яе аўтар – дзіцячая пісьменніца Алена Пушкіна.

 

– Гэта настольная гульня-хадзілка, якая была распрацавана спецыяльна да Дня беларускага пісьменства. Удзельнікам неабходна сабраць рукапіс і прачытаць тайнае пасланне Скарыны, – расказала аўтар. 

 

 

Набыць настолку можна ў новай кнігарні “Санет”. Таксама яна будзе падарункам удзельнікам квэст-гульні “Код Сапегі”. Гэты квэст можа стаць самым маштабным гарадскім квэстам у Беларусі. Гульня будзе праходзіць з 10.00 да 17.00 па ўсім горадзе. Але гэта не значыць, што на ўвесь дзень давядзецца забыцца на іншыя пляцоўкі і праграмы. Выконваць заданні можна калі заўгодна. Для ўдзельнікаў – ніякіх абмежаванняў па часе праходжання гульні і ўзросце. Старт – на цэнтральнай плошчы.

 

– Квэст – гэта гульнёва-забаўляльны складнік і адначасова гістарычная экскурсія. Задача ўдзельнікаў – выканаць дзясятак заданняў, запоўніць прабелы ў гісторыі і разгадаць “код Сапегі”, – анансаваўдырэктар кампаніі IgraRoom Віктар Раманейка.

 

Якія заданні? Даведаемся 1 верасня. Арганізатары інтрыгуюць, задаючы пытанні, звязаныя з гульнёй: якая сувязь паміж Змітраком Бядулям і іўрытам, якім быў старабеларускі алфавіт, чаму помнік Леніну ў Слоніме ўнікальны?.. Цікава? Тады ўдзельнічайце ў квэсце і ўсё даведаецеся.